Mona


بغض النظر عن اللى بيحصل ومين مؤيد ومين معارض لازم نفكر فى اللى جاى وهيكون دورنا ايه وازاى نصلح فى بلدنا ياريت كلنا نشارك فى الجروب ده ونقول أفكارنا فى كل المجالات

http://www.facebook.com/group.php?gid=5795701271#!/home.php?sk=group_152176458170687&ap=1

على فكرة الجروب ده مش مجرد كلام لان اللى عامله معيد فى كلية هندسة وكان عامل مشروع لتطوير التعليم الصناعى وبدأ بخطوت فعلية

9 التعليقات | | edit post
ردود الأفعال: 
Mona

كل سنة وانتوا طيبين بمناسبة السنة الجديدة الهجرية والميلادية
ويارب تكون سنة سعيدة عليكم

وحبيت اقولكم فكرة قالتهالى صحبتى اننا نجيب اجندة ومع كل يوم من ايام السنة نكتب الحاجات الحلوة اللى عملناها والحاجات اللى مش حلوة ونحاول نحاسب نفسنا دايما

يارب الفكرة تعجبكم
وان شاء الله تكون سنة سعيدة علينا وعلى الامة الاسلامية كلها

22 التعليقات | | edit post
ردود الأفعال: 
Mona

قبل ماتش الجزائر 14/11 (ورغم استفزاز الجمهور الجزائرى والصحافة الجزائرية للمصريين ) كنت بتضايق لما حد مننا بيرد عليهم بنفس الاسلوب او بيهاجم الجزائر كشعب لاننا برضو بينا اخوة وكنت بقول مش ماتش كورة هنخسر بعض بسببه


لكن بعد اللى حصل فى السودان واننا رغم الخسارة اعتدوا علينا بالبلطجية بتوعهم

واللى يغيظ اكتر انهم يقولوا ان احنا اللى بدأنا الحرب النفسية والاعتداءات كمان (مع ان موضوع الحرب الاعلامية ده يعتبر ماركة مسجلة باسمهم)


دلوقتى انا رجعت فى كلامى وصدقت ان كل كلمة اتقالت كانت صحيحة (مع اعتذارى للشعب الجزائرى الغير متعصب واللى اكيد فى منه كتير ومش موافق على اللى حصل ده) بس اللى اتعمل فينا صعب نسكت عليه وكفاية اوى انهم يحرقوا او يدوسوا على علم مصر وانهم يقولوا علينا يهود

بس حتى لو هما صدقوا نفسهم العالم كله عارف ان احنا اللى انتصرنا على اليهود
13 التعليقات | | edit post
ردود الأفعال: 
Mona
فى حكاية غريبة اوى حصلت من يومين
كان فى طيارة رحلتها من القاهرة لنيويورك
بعد اقلاع الطيارة ..الطيار فوجىء ان واحدة امريكية معاها علبة وقالتله ان فى صديق مصرى اداها الهدية دى وهى خايفة منها
الطيار خاف يفتح العلبة وقرر انه يرجع تانى للقاهرة وبلغ برج المراقبة عشان يعملوا الاستعدادات الامنية والمطار اتملى بعربيات الاسعاف والمطافى
ولما الطيارة وصلت وفتحوا العلبة لقوا فيها كعك العيد
والطيارة رجعت تانى لنيويورك بس البنت دى مرجعتش معاهم
السر بقى فى الحكاية دى ان البنت دى كانت بتحب شاب مصرى وهى فى الطيارة مقدرتش تسافر وتسيبه عشان كده فكرت فى الموضوع ده عشان ترجع تانى للقاهرة
6 التعليقات | | edit post
ردود الأفعال: 
Mona
المرة اللى فاتت لما موضوع الصين اتفتح كان كل كلامنا اننا مش بنعمل حاجة خالص وكل اعتمادنا على الصين
انا كنت فاكرة كده لحد ما روحت التدريب ودلوقتى هحكيلكوا الحكاية من اولها

البداية لما عرفت انى هتدرب فى الشركة دى كنت زعلانة اوى بالذات انى كل ما اقول لحد عليها يقولى انها بتخسر وشركة اى كلام
المهم رحت انا و2 من صحابى اول يوم( واحنا واخدة منها موقف وقلنا اهو تدريب وخلاص والسنة الجاية نشوف مكان احلى)لقيت الناس اللى هناك كويسين اوى وبيعاملونا كأننا بناتهم وكل ما حد يشوفنا يقولنا تشربوا شاى؟(واحنا طبعا مضيعناش الفرصة وبقينا نشرب معاهم ونفطر كمان)

اللى كان مزعلنى انهم كويسين اوى وتعاملهم مع بعض حلو اوى يعنى جو ينجح اى شركة قلت فيها ايه لو يحاولوا يفهموا شغلهم ويركزوا فيه اكيد الشركة هتبقى حاجة تانية
المفاجأة لما بدأوا يشرحولنا لقيت ان كلهم ما شاء الله عليهم فاهمين شغلهم وبيحبوه اوى
مش حد ولا 2 تقريبا كلهم مهندسين وكيميائين وعمال وده اللى جننى اكتر ازاى كل ده والشركة بتخسر وكان كل ما حد يتكلم يقولنا ان الشركة دلوقتى بتخسر وحالها بيتدهور ولما نسألهم ليه يقولولنا دى سياسة دولة!!

فى الاول مكنتش فاهمة الحكاية بعدين عرفت انه بعد اتفاقية الجات والحاجات الصينى والمستوردة عموما بقت مالية البلد بقى كله بيشترى الحاجات المستوردة ومش بياخد حاجة من الشركة وده طبعا خلاها تبدأ تخسر وبعد ما كانت من اكبر الشركات ف الشرق الاوسط دلوقتى موقفة معظم المكن اللى عندها
والمفروض انهم بيولدوا الكهرباء فى الشركة بدل ما يشتروا.. مفيش الكلام ده دلوقتى
وكانت اصعب حاجة بجد لما دخلنا المخزن وشوفنا حاجات قد ايه معمولة ومش عارفين يتصرفوا فيها مع ان جودتها كويسة
كان نفسنا بجد نقول شجع المنتج الوطنى .. بس هنقول لمين اذا كنا احنا السبب فى ده
والسؤال الى مضايقنى ان دى شركة المفرووض انها معروفة وبيحصل فيها كده امال الشركات اللى لسة جديدة ومفيش حد يعرف عنها حاجة حالها ازاى؟!
15 التعليقات | | edit post
ردود الأفعال: 
Mona



انا كنت محتارة ابدأ بايه فى المدونة بس امبارح وانا ماشية مع صحابى شفت فوانيس رمضان وفرحت اوى لما لقيت فوانيس المفتش كرومبو.. كانت اشكالها حلو اوى.. وقلت اخيرا حد مصرى عملنا حاجة بتاعتنا وكلنا بنحبها وكفاية بقى الفوانيس الصينى واهو نعمل حاجة بنفسنا ونريح الصين شوية (مش عارفة ايه السذاجة اللى كنت فيها دى)بس بصراحة مكنتش مصدقة نفسى اوى بس حاولت اقنعها ان دى صناعة مصرية بجد وقلت يعنى الصين هتعرف كرومبو منين او اننا بنحبه لكن المفاجأة لما بصيت ع الفانوس ولقيت الجملة المعتادة (صنع فى الصين)بصراحة ضحكت عليا عشان اتخيلت اننا ممكن نعمل حاجة بس برضو لسة عندى امل ان حاجة تتغير ونعمل حاجة
8 التعليقات | | edit post
ردود الأفعال: 
Mona






اهلا بيكم فى مدونتى ويارب تقبلونى معاكم مدونة جديدة



ممكن اكون مش بعرف اكتب اوى بس عايزة حد احكى معاه



يارب المدونة تعجبكم
9 التعليقات | | edit post
ردود الأفعال: